Gróthøggari

Ein gróthøggari arbeiðir við at klúgva, høgga og passa grót til. Í skúlanum lærir tú um ymiskt grót. Somuleiðis lærir tú at høgga stavir og prýða t.d. gravsteinar.

Um útbúgvingina

Ein týdningarmikil partur av útbúgvingini og dagliga arbeiðinum er at vegleiða kundar um, hvat tilfar hóskar best til tað, tey vilja hava. Rætti steinurin skal brúkast, og tú skalt listaliga kunna tekna eina loysn til uppgávuna.

Útbúgvingin gevur grundleggjandi vitan um eginleikarnar í ymsum gróti, og tú lærir ymiska tøkni við hamara, meitli og lufttrýstsriknum maskinum. Tú fært kunnleika um, hvussu tú handfert grót listaliga og handverksliga.

Gróthøggarin kennir eisini til onnur arbeiðsøki, sum krevja ástøðiliga vitan um bygningssøgu, skapandi og listaliga tekning o.a. Sum gróthøggari skalt tú vera tilvitaður um at lyfta tungt.

Tí lærir tú at brúka hjálpitól og at verja teg.

Skipan av útbúgvingini

Allar yrkisútbúgvingar eru skipaðar soleiðis, at skift verður millum verkliga læru á góðkendum læruplássi og skúlagongd á yrkisskúla.

Útbúgvingin er skipað við einari grundtilgongd á einum yrkisskúla í 20 ella 40 vikur og einari høvuðstilgongd, har tú skiftir millum starvsvenjing og skúla.

Frálæran fevnir m.a. um skrifttekn, at høgga og klúgva grót, tekningarlæru og tilfarsfatan.

Tú skalt eisini hava lærugreinar sum t.d. støddfrøði, talgilda tekning, bygningssøgu og gaffiltrukkskeið

Við hesi útbúgving er tað umráðandi, at tú:

• ert kropsliga væl fyri
• ert handaligur og hevur hug at brúka tínar hendur
• hevur skil fyri rúmi og skapi
• kanst arbeiða skapandi
• hevur skil fyri góðsku og smálutum
• kanst arbeiða nærlagt og neyvt
• hevur áhuga fyri at arbeiða við KT-amboðum
• kanst arbeiða saman við øðrum fakbólkum
• hevur tænastusinni og dugir at tosa við kundar
• kennir reglurnar í fakinum og kanst brúka reglurnar.

Útbúgvingin endar við sveinaroynd.

Upptøkutreytir

Fráfaringarroynd fólkaskúlans ella tilsvarandi.

Starvsmøguleikar

Eftir lokna útbúgving kanst tú arbeiða sum góðkendur gróthøggari á gróthøggaraverkstaði ella aðrari fyritøku, sum arbeiðir við at umvæla og prýða bygningar, gera havnaanlegg ella trappur.

Tú kanst eisini gerast sjálvstøðugur vinnurekandi.

Framhaldandi útbúgving

Tú kanst eisini fara undir framhaldsútbúgving.

Tú hevur atgongd til vinnuakademiútbúgvingina:

• Byggisamskipari

Tú kanst eisini víðari útbúgva teg á einari vinnuakademiútbúgving, sum tú velir tær. Gev gætur, at yrkisútbúgvingin skal vera ásett til at vara í minsta lagi 3 ár fyri at geva atgongd til vinnuakademiútbúgvingar. Eisini eru krøv um ávísar lærugreinar og stig, tú skalt hava staðið, alt eftir hvørja vinnuakademiútbúgving tú søkir inn á.

Vinnuakademiútbúgvingar eru framhaldsútbúgvingar – vanliga 2 ár til longdar, settar saman við ástøði og starvsvenjing, knýttar at ávísari vinnu ella starvsøki.

Fleiri yrkisútbúgvingar geva tær eisini atgongd til professiónsbachelor og til bachelor­útbúgvingar á universitetum.

Yrkisútbúgvingin til gróthøggara er á 4. stigi í donsku góðskingarkørmunum fyri lívlanga læru. Góðskukarmurin gongur frá stigi 1–8 og ásetur tað, ið væntandi fæst burtur úr undirvísingini.

Meiri kunning

Les meiri á Uddannelsesguiden www.ug.dk her
Les "Ofta Settir Spurningar" her
Yrkisdepilin – www.yrkisdepilin.fo