Gymnasialar miðnámsútbúgvingar

Tá ið tú skalt velja lestrarbreyt á gymnasialum miðnámsskúla, eigur tú at hugsa um, hvørja útbúgving tú hevur hug at halda fram við eftir loknan miðnámsskúla. Ein gymnasial mið­náms­útbúgving er fyrst og fremst ein fyrireiking til hægri lestur og hægri útbúgving á ávísum øki ella yrki.

Tú kanst ráðføra teg við skúlavegleiðaran á tínum fólkaskúla um útbúgvingar­møguleikar eftir lokna miðnámsútbúgving, ella tú kanst seta teg í samband við ein lestrar­vegleiðara á einum miðnámsskúla og tosa við vegleiðaran um framhaldsútbúgvingar­møguleikar.

Tú kanst taka eina gymnasiala útbúgving á 8 ymiskum breytum:

Breytir

• Búskaparbreyt
• Hugbreyt
• Náttúrubreyt
• Tilfeingisbreyt
• Tøknibreyt
• Fyrireikingarbreyt
• International Program
• Serflokkur innan autismuøkið

Við sínum serligu eyðkennum geva hesir 8 møguleikarnir tær høvi at velja eina gymnasiala útbúgving eftir egnum ynskjum og áhugamálum.

Útbúgvingarnar eru allar bygdar upp eftir sama leisti við felagslærugreinum, breytarlærugreinum og vallærugreinum.

Felagslærugreinar eru kravdar lærugreinar á øllum útbúgvingunum.
Breytarlærugreinar eru kravdar lærugreinar, sum eyðkenna ymisku útbúgvingarnar.
Vallærugreinar eru lærugreinar, ið tú kanst velja eftir egnum áhuga, tó við serstøkum avmarkingum á teimum einstøku útbúgvingunum.

Lærugreinarnar eru flokkaðar í C, B og A stig har C er lægsta stig og A hægsta stig, tú kanst náa í eini miðnámsútbúgving.

Á búskapar-, hug- og náttúrubreytini, umframt International Program og tilboðnum innan autismuøkið skalt tú hava í minsta lagi 4 A-stig og 3 B-stig.

Á tilfeingis- og tøknibreytini skalt tú í minsta lagi hava 3 A-stig og 4 B-stig, og á
fyrireikingarbreytini skalt tú í minsta lagi hava 2 A-stig og 3 B-stig.

Fyrsta árið á einari gymnasialari útbúgving fylla felagslærugreinarnar nógv á
tímatalvuni, meðan 2. og 3. árið taka breytarlærugreinarnar og vallærugreinarnar so líðandi yvir.

Felagslærugreinarnar eru:
• Føroyskt A
• Enskt B
• Søga C
• Ítróttur og heilsa C
• Samfelagsfrøði C
• Støddfrøði C

Stuðul

Sum næmingur á eini gymnasialari miðnámsútbúgving hevur tú rætt til lestrarstuðul frá Studna. Tú søkir um stuðul, tá tú byrjar útbúgvingina.

Um tú ert undir 18 ár fært tú ikki lestrarstuðul, men hevur rætt til ískoytisstuðul til keyp av undirvísingartilfari (bókastuðul). Harafturat er møguleiki at søkja um ískoytisstuðul til vistarhald (vistarhaldsstuðul).

Bókastuðulin verður latin øllum næmingum, ið ikki hava fylt 18 ár innan 1. august, tá skúlaárið byrjar. Bókastuðulin verður útgoldin fyrst í stuðulsárinum.

Vistarhaldsstuðulin verður latin avbygdanæmingum undir 18 ár, sum noyðast at flyta til útbúgvingarstaðið. Treytin fyri at fáa henda stuðul er, at sjóvegis farleið er millum heimabústað og skúlan, ella at vegalongdin millum heimabústað og skúlan er longri enn 50 km.

Tey, ið verða 18 ár í stuðulsárinum, fáa stuðulin mánaðin eftir, at tey eru fylt 18 ár. Tá hava hesi eisini møguleika at søkja um lán.

Tú kanst fáa meira at vita um lestrarstuðulin og stuðulsskipanina á www.studni.fo.

Undirvísingartilfar

Í miðnámsútbúgvingunum skalt tú sjálv/ur keypa alt undirvísingartilfar, eitt nú bøkur, sum verða brúktar í undirvísingini. Hetta merkir, at tú við skúlaársbyrjan mást rokna við at brúka einar 3.500 kr. til bøkur. Hvussu stór upphæddin er, veldst um, hvørjari breyt tú byrjar á. Harumframt kann tann einstaki skúlin krevja gjald fyri ljósritað tilfar, sum verður brúkt í undirvísingini.